Хийсэн гэм нүгэл арилдаг уу?

Асуулт:

Би нэг хичээл дээр хальт сонсож байсан юм байна. Хэрвээ маш ихээр гэмшиж наминчилвал гэм нь цайрдаг гэж. Харин тэр хийсэн бүх гэм нүгэл нь арилах талаар сайн мэдэхгүй юм.

Хариулт:

Хүн гараа хугалчихаад боож, эм тан ууж арга хэмжээ авснаар түргэн бороолж эдгэлээ гэж бодий. Хэдий эдгэсэн боловч бороолж эдгэсэн гар анхны хугараагүй байсан үеийн гартай адил бол биш юм. Та хүн гомдоогоод дараагаар уучлалт гуйсан ч тэр хүнд тодорхой хэмжээний сэв үлддэг. Тиймээс нүгэлээ наминчилах арга хэрэглэснээр бас цэвэр түүнээс бас төгс ангижирахгүй бөгөөд муу үйлийн үрийг багасгасан хэлбэрээр амсаж болох юм. Тухайлбал та зүүдээрээ амсаж болно. Мөн өөр багасгасан хэлбэрээр ч амсаж болно. Мөн ургамалын үрийг нь хуурчихвал гадаад нөхцөл нь байлаа гээд үр хэзээ ч боловсрохгүйтэй адил муу үйлийн үрийг хэзээ ч боловсруулахгүй болгож бас болдог. Энэ мэтийн нарийн зүйлүүд их бий. Нүгэлээ цайруулах олон арга ер нь байдаг. Бурханы шашны судар номлолыг дэлгэрэнгүй судалж мэдээрэй.