Далай Багшийн Шүгдэнг шүтэхийг хориглосон зарлиг 5

‎2006 оны 3-р сарын 27-ний өдөр. Дээрхийн Гэгээнтэн хаврын номд суухаар Төвдөөс Энэтхэгт ирсэн хүмүүст Шүгдэнгийн тухай айлдсан айлдварын хэсгээс...

...Пүржог Агваанжамбын зохиосон “Гурван Хийдийн Түүх” (Дэнса Сүм-жи Лоржү) номын Гандан хийдийн тухай өгүүлдэг хэсэгт Шүгдэн шүтэхийг хориглож байсан тухай гардаг. VII Далай Лам Галсанжамцын ёнзон багш Дэчин Агваанчогдан бээр Богд Ламын суудалд сууж байхдаа Гандан хийдэд ертөнцийн догшин тэнгэр, сахиусыг шүтэхийг хориглож байсан. Энэ тухай Түган Чойжинямын зохиосон Жанжаа Ролбийдоржийн намтарт Дэчин Агваанчогдан бээр Гандан хийдэд ертөнцийн эгэл тэнгэр сэлтийг шүтэх нь зохисгүй хэмээн Шүгдэнгийн нэрийг тодорхой хэлж шүтэхийг хориглон, гадагш гаргаж байсныг тодорхой өгүүлдэг.
VIII Далай Лам Жамбалжамцын багш Ёнзон Ишжанцан бээр VII Ванчин Богд Дамбийнямааг сургаал айлдаж “Дашлхүмбэд шинэ сахиус гэгдээд байгаа тэр чөтгөр нэг өдөр хуурна шүү!” хэмээн сануулж байсан гэдэг. VIII Ванчин Богд Данбийванчүгийн намтарт Дашлхүмбэ хийдэд дахих хэмжээнд хүрсэн сахиусыг л шүтэхээс биш Шүгдэнг шүтэж болохгүй хэмээн зарлиг гаргаж нийтэд тарааж байсан тухай тодорхой өгүүлдэг. Ямартай ч өмнөх Далай Лам нарын намтар болон Шарын шашныг барьж байсан ихэс дээдэс нарын намтрыг судалж үзэхэд эрдэм бүтээлийн оргилд хүрсэн мэргэд, дээд төрөлхтөн нар Шүгдэнг шүтэхийг хориглож байсан нь тодорхой гардаг...